A Xunta e o Concello realizan un investimento duns 95.000 euros
A alcaldesa do Rosal, Ánxela Fernández, e o delegado territorial da Xunta en Pontevedra, Agustín Reguera, visitaron onte as dúas novas caldeiras de biomasa que se colocaron en dúas instalacións deportivas cun elevado número de persoas usuarias: o pavillón municipal e o campo de fútbol da Mata. Cun investimento de 95.000 euros cofinanciada entre ambas as administracións, con esta renovación levou a cabo a substitución das caldeiras de gasóleo por dous de pellets con combustible de biomasa para a produción de calefacción para estes edificios e de auga quente para as duchas dos seus correspondentes vestiarios.
Trátase dunha modernización das instalacións municipais para adaptalas ao uso de enerxías menos contaminantes e renovando equipos obsoletos, nos que tamén se mellora o seu illamento e regulación, permitindo un control total do sistema con termostatos de ambiente e telegestión.
Con estas novas caldeiras de biomasa, o Concello do Rosal segue traballando na redución das emisións de CO2 do municipio, redundando nun aforro económico e enerxético. O obxectivo é reducir a pegada de carbono á vez que se mellora o confort dos usuarios. “Seguimos convertendo O Rosal nun referente na utilización de enerxías renovables”, resaltou a alcaldesa.
